ಹಸಿವಿನ ಯಾತ್ರೆ (Kannada Kavana)

ಮುಂಜಾನೆಯ ನೇಸರನು ಬಾಚಿತಬ್ಬಿಕೊಳ್ಳಲು

ಜಗವೆಲ್ಲ ನಮಿಸಲು ಇನ್ನೊಂದು ಬೆಳಕಿಗೆ

ನೊಂದು ಬೆಂದಳು ಆಕೆ ಮತ್ತೊಂದು ಹಗಲಿಗೆ ;

ಸವೆದ ಚಪ್ಪಲಿ, ಹರಿದ ಸೆರಗು -

ಕಣ್ಣಂಚಿನಲಿ ಆಸೆ-ಆಕಾಂಕ್ಷೆಯ ಛಾಯೆ

ಭರವಸೆಯ ಬೆಳಕಿನೊಂದಿಗೆ ಹೊರಟಿತು ಪಯಣ !

ಬದುಕೆಂಬ ಯಾತ್ರೆಗೆ ಹಸಿವೆಂಬ ಶಾಪ ;

ಮೊಕ್ಷವೆಲ್ಲಿದೆ ಬಾಳತುಂಬ ನಿಶೆಯು ಆವರಿಸಲು?

ನಗುವ ತಂದ ಕಂದನ ನಗುವ ನೋಡುವ ತವಕ

ಮಗುವಿನ ನಗುವಿನೊಂದಿಗೆ ಹೊರಟಿತು ಹಸಿವಿನ ಪಯಣ !

ಕೈ ಒಡ್ಡಿದವು ಬೆರಳುಗಲು ಹಸಿವನೀಗಿಸಲು

ಅಸ್ಪ್ರಶ್ಯವೆಂಬ ಪಾಷಾಣ ನುಂಗಿ ಕುಡಿಯಿತು ಮಗದೊಮ್ಮೆ!

ಮತ್ತದೆ ರಣಕೇಕೆ ಬಗೆದವು ಆಕೆಯ ಒಡಲು

ಅವಮಾನದ ಬೆಂಕಿಯೊಂದಿಗೆ ಹೊರತಿತು ಹಸಿವಿನ  ಪಯಣ !

ಹೆಜ್ಜೆ ಉರುಳಿದವು ಬಹುದೂರದವರೆಗೆ

ಕತ್ತಲ ಹಾದಿಯಲಿ ಬೆಳಕಿನ ಕಡೆಗೆ;

ಹತಾಶೆಯ ನೆರಳು ಮಗದೊಮ್ಮೆ ಆವರಿಸಲು

ನಿರಾಶೆಯ ಬುತ್ತಿಯೊಂದಿಗೆ ಹೊರಟಿತು ಹಸಿವಿನ  ಪಯಣ !

ಮರಳಿತು ಗೂಡಿಗೆ ಕಂದನ ತೊಟ್ಟಿಲೆಡೆಗೆ

ಮತ್ತದೇ ಕೊಚ್ಚಲಿನ ಪಾನೀಯ ಕೂಸಿನ ಉದರಕ್ಕೆ!

ರಾತ್ರಿಯು ಬಾಚಲು ಅಕ್ಷಿಪಟಲವು ಮಲಗಲು

ಮುಂಜಾನೆಯ ಸೂರ್ಯನು ಮತ್ತೊಂಮ್ಮೆ ನಸುನಗಲು

ಭರವಸೆಯ ಬೆಳಕಿನೊಂದಿಗೆ ಹೊರಟಿತು ತಾಯಿಯ ಪಯಣ

ಮತ್ತದೇ ಗುರಿಯೊಂದಿಗೆ ಕಂದನ ನಗುವೊಂದಿಗೆ !!